Fragmento de Curuzú en Guaraní

Peteĩ yvytu atã oipeju remanohague ka’arúpe. Che voi oguãhẽ upe kurusu jakarati’agui apopyréndive remoíva’ekue peteĩ ára Ña Felipa ñeñotỹhápe, upe kuñakarai rehayhuetéva’ekue ndaikuaái mba’erepa. Ñanandy ojaho’epaitevoi, ha ku nde ao’i pytã oĩ gueteri uṕépe, upe rañapytĩva’ekue ñeha’ãpýpe ha che añangarekova’ekue peteĩ ne’ãngue voréicha. Yvága iñypytũmbaite kuri ha che hegui okañy che resa rohecháhaguã ipahaite. Yvy oñembogua nde rovápe, neakãrague hũme aikuaáporãitéva, nerendyva oñembojavo’oipáva reikoitereihaguére umi áraresápe. Che retepýpegua memby nachekane’õi amañahaguã nde rehe. Che Yvera iporo’oitéva, akyhyje nderehe, akyhyjete upe kirirĩ oñemboyvyra’akua che ahy’ope ha ndaikatúi asapukái. Ndaikatúi amondýi umi karakara ovy’ava nde po’a’ỹre. Jepivénte cherasẽrõguare, ha’ekuri upe ka’aru. Upépe ajekopyty kuimba’eku’erare, upépe ahechakuaa ipane añeteguáva. Chemoñeko’õi umi tahachi oma’ẽvaíva’ekue ñepena’ỹme, toñe’ẽ ndéve michivéva ñemboaje’ỹme. Che rohayhuetereíva’ekue che pirĩmba upéicha. Sargento Arcadio Manuel Jiménez upe neakã’otava hína, hesa ha’etéva Añaretãmegua resápe, umi mymbakuéra okañymíva’ekue pirity mbytépe. Okyhyje kuri pe aña memby, kyhyje pe nema’ẽme remongereírõ guãrã. Upévare nemosaingo nde pýgui upe jakarati’a ijyvatevévarehe ha repyta nde jyva ikurusu, pysyrõ’ỹme. Ha nipeteĩ py’aro pehẽngue nema’ẽme. Upéicha jepeve 

Continua la traducción de Curuzú (obra de Gladys M Acevedo) por Damián Arce (122)

Comentarios

Entradas populares